Ba sjølv om å få plass hos Bakketeig
Geir Granli og Joakim Myklebust ba sjølve om å få etablera seg i Bakketeig-bygget i Os.
Torsdag ettermiddag var det storfin opning av Bergen Arkitektkontor i andrehøgda av det karakteristiske Bakketeig-bygget på Osøyro. Bergens-firmaet er strålande nøgde med å vera på plass i Os, og ikkje minst: Nett i desse lokala.
– Me gjekk faktisk og banka på til Linda Bakketeig. Me hadde så lyst til å få etablera oss i dette fine huset, seier dagleg leiar i Bergen Arkitektkontor, Joakim Myklebust.
Artikkelen held fram under annonsen.
– Først var ho litt skeptisk, men etter litt att og fram, ordna det seg. Lokala er heilt fantastiske og med paradegata utanfor blir det ein draum å sitja å jobba her, seier Geir Granli.
Sistnemnde blir dagleg leiar ved kontoret i Os.
Gode kontaktar
Bergen Arkitektkontor opna i Bergen i 2014. Kontoret i Os blir firmaets første utanbys.
– Det er naturleg for oss å etablera oss her. Dei siste åra har me hatt mange prosjekt i og rundt bygda her, så no gler me oss til å ta imot kundar, gjester og interesserte til samtalar her i Os, seier Granli.
I lag med Carl Thomas Egenes blir han noko lunde fast på Os-kontoret.
– Me er totalt sju tilsette i firmaet, og alle kjem til å jobba litt på begge kontora. Arbeidsdagane blir etter kvart styrte etter kva prosjekt me er involverte i, seier Mykjebust.
Torsdag hadde dei invitert ei rekkje noverande og forhåpentlegvis komande kundar til opninga av kontoret.
– Me har mange gode kontaktar i Os, både innan det offentlege, innanfor næringslivet og her i sentrum, men me ønskjer jo å bli kjent med fleire og seia at: Hei, her er me, smiler Myklebust.
Artikkelen held fram under annonsen.
Vil ekspandera
Gutane har mange godord om Os-bygda og kommunen her.
– Dette er ein kommune i sterk vekst. Dessutan er Os sentrum i ferd med å revitaliserast og urbaniserast. Det er mange byggjeprosjekt på gang og stor tilflytting. Me har veldig lyst å vera med på alt det spennande som skjer med «Liv på Øyro» og alt det der, seier duoen.
Om alt går som dei ønskjer, vert det gjerne fleire faste tilsette på Os-kontoret.
– Me ønskjer å ekspandera. Om me får oppdrag til det, ser me ikkje bort frå at me utvidar arbeidsstokken i tida framover, konstaterer Granli og Myklebust.
Har skjønt det
Leiar i Os Sentrumsforening var blant gjestene som stakk innom torsdag. Han ønskjer den nye bedrifta hjarteleg velkomen.
– Det er utruleg kjekt dette. Det er tydeleg at folk har skjønt at det er i Os det skjer. At dei i tillegg ville til sentrum, er særs hyggjeleg. Me tek dette som nok eit teikn på at det «livast» på Øyro, smiler Lindborg.
kenneth.svenningsen@osogfusa.no
